GIVE THANKS!!

Laigelh mi hikei mah leng, ka lungsim ah ahong let luat man in ka hon gelh khia hi.  Lungsim a dimleet kam in a gen khia chih mah bang in.

Pathian kiang ah kipahthu gen di ngaihsak lou in a nget lam kia i chiing ua, pathian tung ah lungkim naak saang in i vuui zomah lai uhi. Ka thil tuah tungtawn a ka theih thak 'Pathian hon kep dan leh amah kiang ah kipahthu gen' gige ding ahih dan tam lou gelh khe himhim ding chia hong kisa ka hi.

November 1, 2007 (Thursday) ni ka U'n a sepna mun lam zuan a ahon paisan ni ding ahi a, Zomi te hih ngeina dan in nopni dahni a kipahpih, kidahpih etsak na dia, gan hiam gou a I neekkhawm sek dan un, ngaihnat latsak na in saa nek khawm a hih deuh zaihzaih ding ka chi uhi.

Saa teng bawl khin ta, huan ding a ka kisak laitak un vangsiat huai tak in sathau sa in ka U khut hong buak kha thahah hi.  A khut pek sung teng buakkha ahih man in Damdawi Inn lam manoh in kintak in ka tai tou veng2 uhi.  Vangsia kisa takmai in Pathian kiang ah bangdiing a hiai bang ka tung ah hong tungsak na hia, ka U khualzin ding kipaak tak a laikuang sawkkhawm a, hoihtak a ki khakkhiak ka ut-ut maizen toh chi’n khasiat na a dim in Toupa tuh ka nuaksan hi.

Damdawi Inn ah 'Burns Casualty' ah ka va luut tak un, nupi khat meikang (approx. 98% burn) kava tuakkha uhi, (a pasal te khong in dowry ziak khawng a lungkimlou a haal uh hi ngei ding in ka lamen hi).  Naa sa in a kikou zuazua a lah bangmah a ahih theituan kei, a pumpi in a mai chih louh a san hethut mai hi.  Huai ka muh tak in ka lungsim hong kikheng lamdang in, aw Toupa hampha hina maizen ing e; hiai ka U khutpek sung neuchik a hih khaak leng vangsia kisa a na tung ah vuui zawmah lai, hiai minu thuak zah kimkhat leeng hilou a, ka U khut pek sung neuchik a meikang bawn vaangsia kisa ka hih leh hiai minu thuak bang ka tung ah hongtung sak hilechin haksa hina tel in chia chi-in vaangpha ka hih lam tak theikhia in Pathian kiang ah kipahthu ka gen hi.

Toupa’n amah muang mite a taisan louh dan, amah a muanna/ginna neih ahoih dan te muthak in ngaihdam ngen in kipahthu Toupa kiang ah ka gen hi.  Huchia hampha kisa tak a Damdawi Inn ah ka om lai in ka lungsim ah

Lungkham dahna te ka tuah chiang a
Dah mahmah a ka omlai in
Ka ngaihtuah in kakipak hi
Toupa non khotuah ziak

Toupa nang non khotuah
Toupa nang non khotuah
Na kiang ah banghiam ka lauh ding
Toupa nang non khotuah

Hiai laa hong ging in awl chik2 a sa hiau hiau in, doctor in dressing a neih zoh in innlam kipaaktak in ka tai kiik vengveng ta uhi.

(07/11/07)