Tu zingkal a ka thiltuah in ka lungsim ngaihtuahna hiai bangzah a luah di’n ka gingta kei. Nii suahlam ah hong suak a; tumlam ah tumkiik dan bangzel a ka hunte zangliam mai ding in ka kingaihsun hi. Hiai zingninou hong suak in bang hong suahpih a bang tumpih ding hiam chih ka ngaihtuah phaban kei himhim hi.
Ka hunzat ngeina dan in office kai di’n ka hong kisa a; laa (only God knows why ~ Kidrock) sa heuhheuh kawm in ka hong ki thrit khe threuhthreuh ta hi. Ka laasak pai fuh dek panpan chihleh blueline bus hatdeuh mai in hong kikhoh phei vutvut a; hong tailiam san mai ding kasakleh; ka ma a rickshawpu in a rickshaw hawllai tuh dawmlou hial in hong phut siatsak ta ek mawk hi. Kisuanglah mahmah a ngaihdam ngen a hihkhial kisa law ding kasakleh koilakah! ngaihdam nget naksang in tua rickshawpupa tuh haan’ in a haan’ khum zawmah lai uhi.
Rickshawpupa a hehsim mahmah alah apau ngamkei. Poisa a mangbang dahtak a aomlai inle engbawlna, enghouna, kouna nasatak a tuak zawmahlai hi. Kamhaat in a kitankhe zou kei ding chih a kitheihman in a pautam kei hi. Tua mun ah ka khawl hang in ka bawltheih omtuanlou ahihmanin ka paikhiaksan hi. Vaite le chu aw….ka chi lungsim hi.
Office ka tungta. Himahleh a vangkim in hiai ka thiltuah (incident) tuh ka lungsim mitkha ah ahong kilang zelzel hi. Vaigam ah kihehpihna tawm hina mahmah e ‘Kou kholam a tuh hichilou’ chi dia ka hong kisakleh ka siat-le-pha theihna in ahong phal himhim ta kei hi. Bangziak ahon phallou mawk ahia chi’n ka pianna Zogam lei; kilbang ka khanna tuh ka don’ kiimveel ta hi. Zogam chia kana minloh sung a khuate, munte, mualte, ami leh sate, ka theihphak na chiangchiang tuh ka mitkha ah ahong kilang dundun mai hi. Ka pianna Zogam lei ah sing-le-lou hing dipdip te (tu’n zaw a keu gawp ta), mundang a omlou asung a tungleng vasa chi tuamtuam thanghou-liandou, phualva, etc., bawltawm (artificial) hilou a ka gam in a pianpih (natural) nga-kiik (waterfall) leh gamsa chi tuamtuam te lou ngal ahoihna, a etlawmna gen ding ka thei kei mai mah hi.
Ka gam ah Zomi lia leh taangte lungkituak in a heikhawm uh ka chi ngam kei hi. Lemna-muanna a om nawn kei. Khat leh khat kigensiatna, kimelmaak bawlna ngen in a dimta hi. Guul in ka mei hon sik om leh aw tu (bite) nuam nang’ e! chi mah bang in I om geekgaak geuh uhi..
Ittna a kiam hiai-hiai ta. Genthei-liangvai, tasamte hehpihna a tawm mahmah ta. A neizou zou, apauzou zou tuh mipil leh mi' zah a suakta hi. A hau leh ahau ki mai-et in; a nei leh a nei mah koppih zii leh pasal dia ki-en in; a neilou daikilkal a mi tuh theihphak leh ngaihsakphak ahita kei hi.
Panpihna loan/langva kuahiam khat in tasam zaw deuhte a ding in hawm ta leh a chethei, a pauthei, a tactic zang siamsiam in ki laak hiau. Kihehpihna himhim om nawn lou.
A neilou nu/pa a loan/langva mutu ding pen in mulou chia a khasiat hang in bangmah a gen theikei, a gen ngam kei. Demna bawl ding in aneih-alam in a chin’ kei, a zuautheihna (chalak) in a daihkei. A neilou tuh panpih naksang in aneihsun natawm/muhding natawm laksak in a omta. Diktatna in vaihawmlou in sum leh paai in vai a hawm zawta hi.
Aw ittna koi ah om na hia?
Aw diktatna koi ah om na hia?
Aw hehpihna koi ah om na hiam?
Hiai bangmai di’n zaw ka hon phalkei ka pianna Zogam lei aw………..
(06/05/08)
No comments:
Post a Comment