Zannitak ka lupdek pat leh ka lawmpa’n hon SMS a, ka simsuak mualmual a ka lupsan sukpah hi. Ahihhangin tua ka SMS ah ‘lawm hon pilvang in aw’ chihpeuh simkha a ka kitheihman in ka thoukhe thak a hoihtak in ka simsuak thak hi.
‘Lawm gam leh nam vai a na thugelh te net tungtawn in kana simkha zel hi’n ka lungsim a khoih thei mahmah hi. Himahleh gamsa in a khekhaap sihpih a; mihing in i kampau sihpih i hihman in hong pilvang in aw, deihsak luat man ahi’ chih teng hon SMS hi.
High School ka kailai ua ka History sinsakpa un pawlpi khawmpi na khat ah i gam kivaipuakdan etsakna tamlou toh pia a ka gen zangzang leh a zingnitak in tua na gen bang na chihna hiam? Huai na chih kua na chihna hiam? chi’n dotna hong lut zungzung a, tua nungsang tuh hichibang thugen’ ka zongsang nawn hetkei achih te bang ka ngaihtuah khe vungvung hi.
Hiai ka genna in heutute gensia dek kahi zenzen kei. Gam leh nam a ding a kipiakzohna te uh thupi kasa a; hoih leng kasa hi. Gim leh tawl khuallou in a mi leh sa te a ding in a hihtheih tawp ua pang in gamlei a humbit uhi. Innsung a zii leh ta, nu leh pa ngai ngoihngoih hinapi a gamlei itt vaang a akipaikna uh thupi kasa mahmah hi.
Himahleh mihing i hihman in ah hoihkim chih a om ngei kei hi. I hihkhelh te, i chin’ louhna te, i dikna te, i diklouhna te hon kawkmuhtu/hilhtu omlou in ei-leh-ei iki thei theikei hi. Liimlang neuchik ah iki en a, i maai (face) teng kia imu hi. A lianzaw deuh ah iki en a, i nunglam imu thei tuankei hi. I nunglam leh maailam ah liimlang lianpi koih a i hong ki-et chiang in i nunglam leng deihbang tak in i mu theipan hi. I ki etna liimlang pen a let semsem leh i kimu chiang semsem mahbang in; i hoihna-hoihlouna hon kawkmuhtu ding a tam semsem leh tuh i kitheichiang semsem ding a, i kibawl hoih thei semsem ding hi. Huchilou in zaw hoih leh dik i kisa kha den diing e!!
Ka lawmpa kei hon tawsawn gige tu, ka pukni a hong phong a, ka lungkhamni a hon hehnem, ka kipahni ahon kipahpihtu in hiaibang deihsak na thu hon geen pen a hon deihsakna alet na zahzah in ka khasiat na a lian hi. Ahihhang in mit a ka muh leh bil a ka zaak, thudik hi a ka theih tuh gum ngamlou ding zeen a meidawi ka hihlouhman in ka mi leh sa, ka gam leh nam hoihnang; khantouhnang hi a ka theih tuh ka gelh ding a, ka gelh tou zeel lai ding chih tuh ka hanchiamna ahi hi.
Kei ngaihdan in bel zaila awih siam te’n awi henla, a gamlei hoihna ding a simthu suutsiam te’n suut henla, a gamlei zuun te’n zuun in, mipi te’n zathuap leng Sianmang huaina in i gam paidan tua sang in a dan a omzaw khamoh kei ding hi.
Amah, i gam leh nam hoih ding deihna a thu le la manpha taktak tampi ana gelh kheta leh, amah thugelh hi a ka theihtaphot sim lou a ka taisan ngeilouh, Kimbawi’ Pa theihdan in ‘A hoih tuh hoih chih di, a hoihlou le hoihlou chih di, a dik lah dik, chih di, a dik lou lah diklou, chih di, huai hileh I gam paidan uh adan a om deuh diam???
(22/05/08)
No comments:
Post a Comment