Banjara Hills chaloge? Kya? Kitna? chia auto pu te vaipau theih sunsun teng zang a ka dopkual leh gintat louh pi in rate ngeina saang a tamzaw ngen a hon sa venvon geuh mawk ua ka pai ut pah kei hi. Sawt kuam tak auto dawp a ka din’ nilouh nung in vangphat huai hia vangsiat huai hia auto hoihlawlou khat in a rate ngeina in pai ding ahon thukimpih man in ka tuang ta hi.
Rewind zual le.. autumn sale kipanpan ta ahihman in alanglang ah showroom ah discount upto 30 – 40% etc chih mu di a tam viau mahmah. Kenle kho lum toh chapal deihdan khawng om khak leh chi’n Nike te showroom ah ka va daak lut leh ka deihdaan chet khat kava mukha a, 30% discount ahihman in bangzah hiam a sakna zah sang ua niam zaw in kava lei hi.
Forward nawn le…. Ahi a, hiai ni pen nidang bang lou tak in nii sa vengvong zel a lah khua hong niim thut zel chia a om nilouh man in khedap ahihkeh chapal hia but di chih ka sai-kaak nilouh hi. Khedap pum iva but phet-phut chiang inleng Hyderabad kha vuah a zuk zek nakleh lampi a tui dim-a-dim phet-phut mawk sek ahihman in a nop khitlouh ni a tam mahmah hi. Huaiziak in ka chapal (leithak) kha vuah a zuk le la hi a zuk keilele odd tuanlou hiven chi’n ka bun hi.
Bangtan hiam auto pu pa’ telegu laa play te ut leh utlou a ka ngaihkhiat sak nung in Biakinn omna mun ka tungta hi. Biakinn kha namdang te a ki kheel ahi a, amau deihdaan leh chiin daan va zuih pih a ngaih man in biakinn kong ah khedap te kisuah in a sung ah kibun lut ngeilou hi. Biakinn sung ah khemna hia ahihkeh manthatna a pan hon humbit ut lua hizaw hia ka thei zoukei, lamdang tak in ka ihmut suak in a hong suak peetmah hi. Va pawtkhe cheuh a va kisuk halh ding ka chi sim a lah kikhawm mi a tam khollouh toh Biakinn sung tun’ khit nung a poimoh tinten lua ahihkei leh mawk pawt-pawt chih te ka chiin ut lam a hih khollouh man in ka ki deek teei-teei a, ka pawt kei hi. Huchiin ihmut suak sim mahleh biakna tawptan tuh ka tu suak teei-teei a, tawpna laa bang ngaih pi in bang ka sa hawhaw kha zawzen hi.
Biakna zou ta tuh akihi phot ta mai hi. Khedap koihna lam manoh a kapai leh ka chapal tuh ana omta kei hi. Lawmte khat khawng in bunkhe zual houh ahi di chia hungaih bawl a kong lam ka dak khiat leh huchidan di kuamah aom hetkei a, miteng pot khin ta ahihman in aloh ngaihna omlou a langlang i mai’ nung nangawn a kimulou ahihchia ka chapal tuh mang ahita mai hi.
Hehtha lah suak sim, nuih lah za sim, zum lah huai sim, khevuak a pai khiat maimah ngai ahihchiang a tuike nuih veivui ngai maimah. Ka chapal luui te khat khong hileh zaw poilou hia i lei thak peentak sese, veivui. Huai kei a sese mang dah leh zaw khawng kachi a, adang te’ a mang lehle bang chituan di a diam ah. Guta pa/nu le huchi lawmlawm a deih bang hon ngetthoh leh a kei dia ka chi phaan-phaan a lah hon ngetthoh taktak lehle aki pe taktak na diam chihbel ka theikei. Aman le ka piakthoh khollouh di lam a theih ziakmah hinteh, hon ngetthoh lou in ana kilaak hiau a, a HIT fuh khop mai.
Thil himhim zaw ei tung ah ahong tung chiang a kitheisiam pan sek a, anuam-ahaksa ei tung a hong tung chiang in anopdan-ahaksatdan ki theipan lel hi. Pastor khat khami mahmah leh Pathian zat mi mahmah khat in mi sihna khawng ah hehnepna/khamuanna thu i geengeen sek na a, ei tung ah ahong tung hialleh athuak ahaksa law mahmah ka pawsiam kei achi hi. Huaiziak in kei a mang lou a midang’ a mang hilehle amau le paammaih sa thou saam zeel ding uh ahihchiang a, kei a amangsa peen mah amang a, midang te’ a amanglouh khah ahoih ahi peen mai ;).
Guta pa/nu kha chihdan a siam mahmah. Amah slipper luui neep-nawp khat honna nawtsiat vanglak inchin butdi bei a hon koih saamlou vanglak. Huchia amah nawtsiat’ peen bun a innlam zuan a ka pai laai in lamkim’ ah ka nu’n hon phone kha chet a ka hilh leh amah le a nuih za law saam zaw ahi ngei ding a, ahon nuui khe masa zawzeen a, nang’ sang a poimoh zaw a om a chihna eive ahon chih kawm in leithil te zaw se thei zeel, mang thei zeel mah hi. Lei thil tangtawn daih di bangmah a om kei, leithil te ziak maimai in ki sulungkham hetken ahon chih leh ahilawngut, hiaibang thu ka theihthak na dia Pathian in hiaibang incident hon tuaksak ahi di ka chi a, lesson khat learned beh hi a ka kitheihman in lehlamtak ah kakipak gu mahmah hi.
(02/09/10)
No comments:
Post a Comment